Bupati Éka Ngrauhin Parikrama Ground Breaking Shortcut

BATURUTI – Bupati Tabanan Ni Putu Éka Wiryastuti nampingin Gubernur Bali I Wayan Koster ring parikrama Ground Breaking Shortcut 3, 4 Singaraja-Mengwitani di Désa Candikuning, Kecamatan Baturiti, Tabanan, Wraspati Wagé Sungsang, (18/7). Margi puniki katarka pinih becik santukan ngliwatin Danu Beratan lan Danu Buyan. Parikrama Ground Breaking taler karauhin olih Kepala Balai Besar Pelaksanaan Jalan Nasional VIII Surabaya I Ketut Darmawahana, Panglima Kodam IX Udayana Benny S, Kapolres Tabanan AKBP Made Sinar Subawa, lan Dandim 1619 Tabanan Toni Sri Hartanto.

Shortcut utawi margi puniki wantah sinalih tunggil saking dasa titik shortcut sané karincikang olih Pemerintah Provinsi Bali. Shortcut ring Désa Candikuning puniki sampun kakaryanin salami asasih. Gubernur Koster ngaptiang shortcut Singaraja-Mengwitani puniki puput ring warsa 2021. Gubernur nyediaang prabéa panukar tanah Rp 230 miliar mawit saking APBD Provinsi Bali. Manut Gubernur Koster, krama garjita santukan tanahnyané kaentasin shortcut. “Dané Bupati Tabanan sampun ngwantu mangda pamargin proyék puniki antar,” baos Gubernur Koster.

Gubernur Koster mapangapti kawéntenan shortcut puniki ngawinang pamargin krama saking Buléléng ka Dénpasar tur sawaliknyané prasida antar. Nénten nemu kapiambeng macet ring margi. Kaaptiang taler ékonomi kramané ngancan nincap. Bupati Tabanan Ni Putu Éka Wiryastuti ngaturang suksma santukan kramané sampun kakaryanang shortcut Singaraja-Mengwitani. Bupati Éka Wiryastuti ngancan garjita santukan margi puniki becik pisan. “Ring Bali, margi ngentasin danu wawu wénten ring Tabanan,” baos Bupati Éka Wiryastuti. *mas

Komentar